ភ្នំពេញ៖ តារារ៉េប វណ្ណដា នឹងច្រៀងបទ Time To Rise ក្នុងព្រឹត្តិការណ៍បិទកីឡាជាតិលើកទី៣ នៅពហុកីឡដ្ឋានជាតិមរតកតេជោ នៅថ្ងៃទី៣០ ខែវិច្ឆិកា ឆ្នាំ២០២២។
យោងតាមគម្រោងកម្មវិធីបិទកីឡាជាតិលើកទី៣ លោក វណ្ណដា នៃផលិតកម្មបារមី និងបង្ហាញទស្សនីយភាពចម្រៀង Time To Rise បន្ទាប់ពីលោកស្រី ឱក សុគន្ធ កញ្ញាច្រៀងបទ ក្រោកឈរ មុននឹងកម្មវិធីកីឡាជាតិត្រូវបិទបញ្ចប់ដោយការពន្លត់ភ្លើងគប់ និងអុជកាំជ្រួច។
អ្វីដែលជាការចាប់អារម្មណ៍នោះគឺកម្មវិធីកីឡាជាតិបានអញ្ជើញលោក វណ្ណដា និងលោក ជី ដេវីត មកច្រៀងក្នុងកម្មវិធីដូចគ្នាដោយគ្រាន់តែលោក ជី ដេវីត ច្រៀងក្នុងពិធីបើក ខណៈលោក វណ្ណដា ជាអ្នកបិទ។
កម្មវិធីនៅថ្ងៃទី៣០ ខែវិច្ឆិកាខាងមុខនឹងមានការចូលរួមពីនាយករដ្ឋមន្ត្រីកម្ពុជា សម្ដេចតេជោ ហ៊ុន សែន ផងដែរ។
គួរឱ្យដឹងផងដែរថា ព្រឹត្តិការណ៍កីឡាជាតិត្រូវបានកំណត់រៀបចំរាល់ពីរឆ្នាំម្តង ចាប់ពីឆ្នាំ២០១៦ និងលើកទី២ នៅឆ្នាំ២០១៨។ ប៉ុន្តែព្រឹត្តិការណ៍នេះ ត្រូវបានអាក់ខានរៀបចំវិញ នៅឆ្នាំ២០២០ ដោយសារវិបត្តិជំងឺកូវីដ-១៩។
កីឡា ៣៨ប្រភេទ សម្រាប់ការប្រកួតកីឡាថ្នាក់ជាតិនេះ ហើយក៏មានកីឡា ៧ប្រភេទសម្រាប់ការការប្រកួតកីឡាជនពិការត្រូវបានក្រសួងអប់រំ និងគណៈកម្មាធិការជាតិអូឡាំពិកកម្ពុជា បានសម្រេចដាក់បញ្ជូលសម្រាប់ការប្រកួតនាឆ្នាំនេះ។ ព្រឹត្តិការណ៍នេះ នឹងធ្វើឡើងចាប់ពីថ្ងៃទី១៩ ដល់ថ្ងៃទី៣០ ខែវិច្ឆិកា ឆ្នាំ២០២២៕